Samuxdan Ulu Öndər Heydər Əliyevin anadan olmasının 101-ci ildönümünə həsr edilmiş bilik yarışı keçirilib
YAP Samux rayon təşkilatında Samux Rayon İcra Hakimiyyətinin, YAP Samux rayon təşkilatının və Samux rayonu üzrə Təhsil sektorunun birgə təşkilatçılığı ilə Ulu Öndər Heydər Əliyevin anadan olmasının 101-ci ildönümünə həsr edilmiş məktəblilər arasında bilik yarışı keçirilib.
Tədbirdə Samux Rayon İcra Hakimiyyətinin başçısı Firdovsi Əliyev, İcra Hakimiyyətinin əməkdaşları, idarə, müəssisə və təşkilatların rəhbərləri, müəllimlər, valideyinlər və məktəblilər iştirak edib.
Samux rayon icra hakimiyyətinin başçısı Firdovsi Əliyev çıxış edərək Ümummili Lider Heydər Əliyevin həyatı və ölkəmizin müstəqilliyi, sosial-iqtisadi inkişafı üçün gördüyü ölçüyəgəlməz işlərdən danışdı. Heydər Əliyev siyasətinin Prezident İlham Əliyev tərəfindən davam etdirilməsi nəticəsində ölkəmizin tarixi uğurlara imza atdığını söylədi. Bilik yarışının əhəmiyyətini xüsusi qeyd edən Firdovsi Əliyev bunun həm də məktəblilər arasında elmə, savada yiyələnmək yolunda maarifləndirici bir tədbir olduğunu qeyd etdi.
Daha sonra çıxış edən YAP Samux rayon təşkilatının sədri Gündüz Bayramov Ulu Öndər Heydər Əliyevin xalqımız üçün etdiyi misilsiz xidmətlərindən söhbət açdı. Yarışın keçirilməsində əsas məqsədin ümummilli lider Heydər Əliyevin həyat və fəaliyyətinin məktəblilər arasında təbliği, onların elmə, maarifləndirici yarışlara marağının artırılması, intellektual və yaradıcı inkişafa təkan verilməsi və effektiv kommunikasiyanın qurulması olduğunu qeyd etdi.
Çıxış edən Samux rayonu üzrə təhsil sektorunun müdiri Nurlana Həsənova Ulu Öndər Heydər Əliyevin 101 illiyinə həsr edilmiş yarışın əhəmiyyətindən danışdı.
Daha sonra natiqlər yarış iştirakçılarına uğurlar arzuladılar.
Bilik yarışında 17 məktəbdən hər komandada 5 nəfər şagird olmaqla 85 nəfər şagird iştirak edirdi.
Komandalar arasında olduqca maraqlı keçən intellektual bilik yarışında Samux şəhər 3 saylı tam orta məktəb I yer, Qarayeri qəsəbə 1 saylı məktəb-lisey II yer, İnstitut qəsəbə tam orta məktəb isə III yer tutdular.
Bilik yarışında qalib gələn şagirdlərə Fəxri Fərman və qiymətli hədiyyələrin Ulu Öndərin anadan olmasının 101-ci ildönümünə həsr edilmiş ümumrayon tədbirində təqdim edilməsi nəzərdə tutulmuşdur.
