Samux Rayon Ağsaqqallar Şurasının hesabat yığıncağı keçirilib
Samux Rayon Ağsaqqallar Şurasının 2023-cü il ərzində gördüyü işlərin yekununa dair Hesabat yığıncağı keçirilib. Samux Rayon İcra Hakimiyyətində keçirilən yığıncaqda Respublika Ağsaqqallar Şurasının sədr müavini Bayram Yusibov, Samux Rayon İcra Hakimiyyətinin başçısı Firdovsi Əliyev, şəhid ailələri, rayon Müharibə, Əmək və Silahlı Qüvvələr Veteranlar Təşkilatının və rayon Ağsaqqallar Şurasının üzvləri, idarə, müəssisə və təşkilatların rəhbərləri, ictimaiyyət nümayəndələri iştirak ediblər.
Tədbir iştirakçıları əvvəlcə Samux şəhərində Ümummilli Liderin adını daşıyan Parkda yerləşən Ulu Öndər Heydər Əliyevin abidəsinin önünə gül dəstələri düzüb, xatirəsini böyük ehtiramla yad ediblər.
Şəhidlərimizin və Ulu Öndərin xatirəsi bir dəqiqəlik sükutla yad olunub.
Samux Rayon İcra Hakimiyyətinin başçısı Firdovsi Əliyev ağsaqqalların ölkəmizin ictimai-mədəni həyatında rolundan, yaşlı nəslin nümayəndələrinə göstərilən dövlət qayğısından danışıb, gənclərin dövlətə, xalqa sədaqət ruhunda, zərərli təsirlərdən uzaq və sağlam əsaslar üzərində tərbiyəsi işində ağsaqqallara hər zaman böyük ehtiyac olduğunu diqqətə çatdırıb.
Çıxış edən Azərbaycan Respublikası Ağsaqqallar Şurası sədrinin müavini Bayram Yusibov son illərdə tarixi Zəfərimizin reallıqları fonunda Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyi ilə ölkəmizdə həyata keçirilən uğurlu sosial-iqtisadi inkişaf strategiyasından bəhs edib. İşğaldan azad edilmiş ərazilərimizlə yanaşı, digər regionlarımızın da inkişaf etdirilməsinə böyük diqqət ayrıldığını vurğulayıb.
Daha sonra Rayon Ağsaqqallar Şurasının sədri Gəray Bayramovun şuranın fəaliyyəti ilə bağlı hesabat məruzəsi dinlənilib.
Samux Rayon Ağsaqqallar Şurasının bir illik fəaliyyəti qənaətbəxş qiymətləndirilib.
Çıxış edən rayon ağsaqqalları ölkəmizdə həyata keçirilən ictimai işlərdə bundan sonra da yaxından iştirak edəcəklərini vurğulayıblar. Ağsaqqallar onlara göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya dərin minnətdarlıqlarını bildiriblər.
