Müdafiə naziri general-polkovnik Zakir Həsənov Samux rayonundan olan yaralı hərbi qulluqçularla Azərbaycan Silahlı Qüvvələrinin Baş Klinik Hospitalında görüşdü.

Müdafiə naziri general-polkovnik Zakir Həsənov Samux rayonundan olan  yaralı hərbi qulluqçularla Azərbaycan Silahlı Qüvvələrinin Baş Klinik Hospitalında görüşdü.

Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevin tapşırığına əsasən sentyabrın 18-də müdafiə naziri general-polkovnik Zakir Həsənov və nazirliyin digər rəhbər heyəti Müdafiə Nazirliyinin Baş Klinik Hospitalında olub.
Əvvəlcə ümummilli lider Heydər Əliyevin hospitalın ərazisində ucaldılan abidəsi önünə gül dəstələri qoyularaq xatirəsi ehtiramla yad edilib.
General-polkovnik Z.Həsənov Ermənistan silahlı qüvvələrinin genişmiqyaslı təxribatlarının qarşısının alınması zamanı yaralanan və Müdafiə Nazirliyinin Baş Klinik Hospitalında müalicə olunan hərbi qulluqçularla görüşərək onların səhhəti və qayğıları ilə maraqlanıb.
Müdafiə nazirinə məruzə olunub ki, hospitalda yaralı hərbçilərimizin müalicəsi üçün bütün tibbi personal yüksək peşəkarlıqla fəaliyyət göstərir.
Sonra nazir palatalarda müalicə olunan  hərbi qulluqçulara baş çəkib, onların səhhəti və reabilitasiya prosesi ilə maraqlanıb, tezliklə sağalaraq xidmət yerlərinə qayıtmalarını arzu edib.
General-polkovnik Zakir Həsənov yaralı hərbi qulluqçularımıza göstərilən xidmətin daha keyfiyyətli təşkil olunması ilə bağlı aidiyyəti üzrə müvafiq tapşırıqlar verib. Qeyd edək ki, ziyarət zamanı Müdafiə naziri general-polkovnik Zakir Həsənov Samux rayonundan olan, Ermənistan silahlı qüvvələrinin genişmiqyaslı təxribatlarının qarşısının alınması zamanı yaralanan hərbi qulluqçular Nəsirov Tələt Həbib oğlu və Aslanov Əli Zəlqəm oğlu ilə görüşüb, səhhətləri ilə maraqlanıb.