Bu il Samuxda 8 yeni subartezian quyusu istifadəyə veriləcək
Kənd təsərrüfatı məhsullarının istehsalında yüksək nəticənin əldə olunmasında əsas şərtlərdən biri əkin sahələrinin suvarma suyu ilə təminatı məsələsidir.
Samux rayon Suvarma Sistemləri İdarəsinin rəisi Gülağa Bağırov AZƏRTAC-a bildirib ki, ötən il rayonda 41 subartezian quyusu qazılıb, 30-u istifadəyə verilib. Qalan 11 quyudan 8-i bu il yaz aylarında işə salınacaq. Digər 3 quyuda isə işlər davam etdirilir.
Qeyd edək ki, subartezian quyularının qazılıb istifadəyə verilməsi Prezident İlham Əliyevin 2016-cı il 1 iyul tarixli “Əkin sahələrinin suvarma suyu ilə təminatının yaxşılaşdırılmasına və əhalinin içməli suya tələbatının ödənilməsinə dair əlavə tədbirlər haqqında” Sərəncamına əsasən həyata keçirilir.
Samux, 20 fevral, Rauf Hacıyev, AZƏRTAC
