Samux rayon İcra Hakimiyyəti yanında fəaliyyət göstərən Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyası tərəfindən görülən işlərə dair tədbir keçirilmişdir.
Tədbir iştirakçıları ilk öncə Samux rayon mərkəzində ucaldılmış Ulu Öndər Heydər Əliyevin heykəlinin önünə tər çiçəklər düzərək, Ulu Öndər Heydər Əliyevin əziz xatirəsini yad etdilər. Tədbirdə giriş nitqi ilə çıxış edən rayon İcra hakimiyyətinin başçısı, cənab Alı Qocayev bildirdi ki, narkomanlığın bəşəriyyətin inkişafına mane olan ən böyük bəlalardan biri olması nəzərə alınaraq, narkomanlığın yayılmasının qarşısının alınması, narkotik vasitələrin, psixotrop maddələrin və onların prekursorlarının qanunsuz dövriyyəsinə qarşı mübarizə müstəqil dövlətimizin memarı ümummilli liderimiz H.Əliyevin siyasi fəaliyyətində mühüm yer tutmuşdur. Məhz bu sahəyə olan diqqətin nəticəsidir ki, 26.08.1996-ci ildə Ulu Öndərin imzası ilə Narkomanlığa və Narkotik Vasitələrin Qanunsuz Dövriyyəsinə qarşı fərman imzalanmışdır. Məhz fərmandan sonra bu istiqamətdə yeni-yeni mühüm sənədlər qəbul edilmişdir.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə ümummilli liderimizin ən layiqli davamçısı ölkə prezidenti cənab İ.Əliyev tərəfindən daha yüksək səviyyədə davam etdirilir. Məlumdur ki, aktuallığı nəzərə alınaraq ölkə prezidenti cənab İ.Əliyevin 2013-cü 24 iyun tarixli 2966 nömrəli Sərəncamı ilə “Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığıa qarşı mübarizəyə dair 2013-2018-ci illər üçün Dövlət Proqramı” qəbul edilmiş və müvəffəqiyətlə davam etdirilir.
Daha sonra Samux rayon İcra Hakimiyyəti yanında fəaliyyət göstərən Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyasının sədri Tahir Qarayev çıxış edərək qeyd etdi ki, rayonda bu mühüm dövlət sənədindən irəli gələn tədbirlərin icrasını təmin etmək məqsədilə İcra Hakimiyyətində müvafiq Tədbirlər Planı hazırlanmışdır. Tədbirlər Planına müvafiq olaraq qəbul edilmiş Dövlət Proqramdan irəli gələn tələblərin icrası istiqamətində müvafiq tədbirlərin görülməsi təmin edilmiş, narkotik vasitələrin, psixotrop maddələrin və onların prekursorlarının qanunsuz dövriyyəsinin və narkomanlığın yayılmasının qarşısını almaq məqsədi ilə vətəndaşların aktiv fəaliyyət göstərməsi üçün İcra Hakimiyyətində etimad telefonu (27-5-19-86) yaradılmış, aidiyyəti orqanların yaxından iştirakı ilə müvafiq tədbirlərin keçirilməsi təmin edilmişdir.
Narkotik vasitələrin, psixotrop maddələrin və onların prekursorlarının qanunsuz dövriyyəsi və narkomanlığa qarşı mübarizəyə dair 2013-2018-ci illər üçün Dövlət Proqramının icrası ilə bağlı Samux rayon İcra Hakimiyyəti yanında fəaliyyət göstərən Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Rayon Komissiyası tərəfindən 2016-cı ilin 6 ayı ərzində hüquq mühafizə orqanlarının və digər aidiyyəti qurumların iştirakı ilə mühüm tədbirlər, o cümlədən maarifləndirici tədbirlər həyata keçirilmiş və keçirilir.
Komissiyanın xətti ilə aidiyyəti qurumlarla birlikdə davamlı olaraq, o cümlədən 26 iyun-“Narkotiklərlə Mübarizə Günü” ərəfəsində şəhər, qəsəbə və kəndlərdə söhbətlərin, dəyirmi masaların və digər maarifləndirmə tədbirlərin həyata keçirilməsi təmin edilir.
Komissiyanın iş planına uyğun olaraq Gənclər və İdman İdarəsi mütamadi olaraq nakomaniya ilə mübarizə mövzusunda müxtəlif tədbirlər keçirilir. 12 fevral 2016- cı il tarixdə Təhsil Şöbəsinin akt zalında “Ümumbəşəri problem olan narkomaniyaya qarşı birgə mübarizə aparaq” mövzusunda dəyirmi masa keçirilmişdir. Gənclərə səslənərək – Əziz dostlar! İnsanın mənəviyyatını alçaldan, intellektual səviyyəsini heçə endirən pis vərdişlərdən uzaq olun! Gəlin birlikdə tütünə, alkaqollu içkilərə narkotiklərə “YOX”deyək və gələcəyimizi bu təhlükədən sığortalayaq deyərək fikirlərini bildirmişdir. İştirakçılar arasında mövzu ətrafında diskussiya aparılmış, iştirakçıların fikir və düşüncələri öyrənilmişdir.
“Narkomaniya haqqında nə bilirik” başlığı altında iştirakçılar arasında fikir mübadiləsi aparılmışdır. İştirakçılara Gənclər və İdman Nazirliyinin “Sağlam həyat tərzini seç”, “Siqaret fərqli öldürür” mövzusunda çap edilmiş bukletlər paylanılmışdır.
Bundan əlavə müntəzəm olaraq rayon Təhsil şöbəsinin xətti ilə ayrı-ayrı təhsil ocaqlarında hüquq-mühafizə, gənclər və səhiyyə işçilərinin iştirakı ilə narkomanlıqla bağlı “Dəyirmi masa”lar təşkil olunmuşdur.
Tədbirlərdə İcra Hakimiyyəti başçısı Aparatının, rayon gəncləri prokurorluğun və polis şöbəsin əməkdaşları, narkotiklərlə mübarizə bölməsinin rəisi, həmçinin ictimaiyyət nümayəndələri və ziyalıların iştirakı təmin olunmuşdur.
Həmçinin, rayonda fəaliyyət göstərən Qeyri-Hökümət Təşkilatlarınınn, təhsil müəssisələrinin və fəal gənclərinin köməyi ilə “ağ ölüm”ün mahiyyətindən bəhs edən bukletlər və video çarxların hazırlanması nəzərə alınmışdır.
Bu gün “Ağ ölüm” adlanan narkomanlığın və QİÇS-in gənclər və məktəblilər arasında yayılması ehtimalı daha böyük olduğundan bu istiqamətdə aparılan təbliğatın və maarifləndirmə işinin çox böyük əhəmiyyəti vardır. Yeniyetmə və gənclərin bu bəşəri xəstəliklər haqqında biliklərini artırmaq məqsədi ilə ümumtəhsil məktəblərin yuxarı sinif şagirdləri arasında rayon ictimaiyyəti və hüquq-mühafizə orqanları nümayəndələrinin iştirakı ilə “Neqativ hallara qarşı birgə mübarizə” və “Narkomaniya ilə mübarizə hər birimizin işidir”, “Sağlamlığımızı birgə qoruyaq”, “QİÇS-in yaranma səbəbləri, fəsadları haqqında nə bilirik “ mövzusunda iştirakçıların fikirləri öyrənilmiş, dəyirmi masalar, söhbətlər keçirilmişdir. Belə söhbətlər Samux şəhər 3 saylı, İnstitut, Qovlarsarı, Alabaşlı, Qarabağlar, Lək, Ziyadlı, Çobanabdallı, Alıuşağı, Zazalı, Seyidlər, Yenikənd ümumtəhsil məktəblərində təşkil olunmuşdur.
İİV–insanın immunçatışmazlığıvirusudur. AİDS/QİÇS - Qazanılmış İmmunçatışmazlığı Sindromudur. Qazanılmış İmmunçatışmazlığı Sindromuna müxtəlif yollarla, o cümlədən xəstənin şprisdən istifadə zamanı yoluxmalar mümkündür. İİV immun sisteminin müəyyən hüceyrələrini zədələyir.
İİV-infeksiyası ləng gedən infeksiyalarına aiddir. Yoluxma anından, spesifik kliniki əlamətlarin birüzə verilməsinə qədər olan dövr bir neçə il (orta hesabla 6-10 il) davam edə bilər. İİV-lə yaşayan bəzi insanlarda, klinik əlamətlər hətta 20 və daha çox il aşkar olunmur. Xəstəliyin gedişi bir çox amillərdən: orqanizmin ümumi vəziyyatindən, müvafiq olaraq - immun sisteminin vəziyyətindən, həyat tərzindən, zərərli vərdişlərin olub-olmamasından və ümumiyyətlə insanın öz həyatına və diaqnozuna münasibətindən asılıdır.
Maarifləndirici tədbirlərlə yanaşı hüquq-mühafizə orqanlarının yaxından iştirakı ilə narkotik vasitələrin qanunsuz alqı- satqıısı, saxlanması və əkilməsi ilə bağlı faktlar aşkar edilərək cinayət işi qaldırılmış, aşkarlanan narkotik maddələr komissiya tərəfindən məhv edilmişdir.
Rayon inzibati ərazisi üzrə qeydiyyatda olan 26 nəfər şəxs Gəncə şəhəri rayonlararası narkoloji dispanserdə narkoman diaqnozu ilə rəsmi qeydiyyatdadırlar. Bu şəxslər daimi nəzarətdə saxlanılmaqla ətraflarında müvafiq əməliyyat tədbirləri davam etdirilir.
Bəşəri bəla olan “Ağ ölüm” adlanan narkomanlığı qarşı mübarizə hər bir vətəndaşın, ailənin, valideynlərin işidir. Gəlin birlikdə bu bəlaya qarşı mübarizə aparaq və narkomanlığa “YOX” deyək.
Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə komissiyası narkomanlığa qarşı mübarizəni daha da gücləndirəcək, hüquq mühafizə və digər aidiyyəti orqanlar ilə əlaqəli işi daha yüksək səviyyəyə qaldıracaqdır.
