Şriftin ölçüsü :

Saytın rəngi :

Samux rayon İcra Hakimiyyəti başçısının 2012-ci ilin yekunlarına və qarşıda duran vəzifələrə dair hesabatı.

20 fevral 2013 | 16:00

 

19 fevral  2013-cü il  tarixində  Samux  rayon  İcra  Hakimiyyəti  başçısının 2012-ci ilin yekunlarına  həsr olunmuş  hesabat  yığıncağı  keçirilmişdir. Hesabat  yığıncağından  əvvəl iştirakçılar tərəfindən  Ümummilli  lider  Heydər Əliyevin abidəsi  önünə  gül  qoyulmuşdur.

260  nəfərin iştirakı  ilə  keçirilən yığıncaqda  idarə, müəssisə  və təşkilatların, hüquq mühafizə  orqanlarının rəhbərləri , bələdiyyə sədrləri, qeyri  hökumət təşkilatlarının, özəl  strukturların, ağsaqqalların, gənclərin, ziyalıların və mətbuatın nümayəndələri iştirak  etmişlər.

 Milli Məclis sədrinin müavini Valeh Ələsgərov, Azərbaycan Respublikası Prezidentinin Administrasiyasının məsul işçisi Habil Əzənmədov    hesabat yığıncağında  iştirak  etmişdir.

Hesabat  yığıncağında  “2012-ci  ildə  sosial – iqtisadi sahədə  görülən işlərin yekunları və 2013-cü ildə qarşıda  duran  vəzifələrə  dair ”  hesabat məruzəsi  ilə  İcra  Hakimiyyəti  başçısı  çıxış  etmişdir. Məruzədə qeyd edilmişdir ki, ölkəmizdə olduğu kimi  2012-ci  il Samux  rayonu üçün də çox uğurlu il olmuşdur. Ötən il  “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrası istiqamətində geniş abadlıq və quruculuq işləri həyata keçirilmişdir. Rayonda  sosial-iqtisadi inkişafın bütün sahələrində əsaslı dönüş yaradılmış və nəticədə yüksək nailiyyətlər əldə olunmuşdur. Əldə olunmuş uğurlar  statistik göstəricilərdə də öz əksini tapmışdır.  Belə ki, Rayonun  inkişafını xarakterizə edən əsas makroiqtisadi göstərici – ümumi məhsul buraxılışının həcmi 98,1 milyon manata çatmışdır. Ötən illə müqayisədə onun həcmi  17,9 faiz artmışdır. Ümumi məhsul buraxılışının adambaşına düşən həcmi 1762 manat olmuşdur. Ümumi məhsul buraxılışının 82,6 faizi  qeyri-dövlət sektorunun payına düşür ki, bu  da əvvəlki illə müqayisədə 5,8 faiz çoxdur.

2012-ci ildə rayon  iqtisadiyyatında çalışan işçilərin orta aylıq əmək haqqı 232,9 manat  təşkil etmişdir ki, bu da 2011-ci illə müqayisədə 3,9 faiz çoxdur.

 Cənab Prezidentin qətiyyəti sayəsində hesabat ilinin iyun ayının 1-dən başlayaraq sovet vaxtından qalan əmanətlərə kompensasiya verilməsinə başlanmışdır. Kompensasiyaların verilməsi rayonumuzda da yüksək səviyyədə təşkil olunmuş və  2012-ci il sonuna kimi rayon üzrə müraciət etmiş 4372 əmanətçiyə vəsait ödənilmişdir. Rayonda  sosial-iqtisadi inkişafın bütün sahələrində əsaslı dönüş yaradılmış və nəticədə yüksək nailiyyətlər əldə olunmuşdur. Azərbaycan Respublikası Prezidentinin 10 aprel 2012-ci il tarixli  Sərəncamı ilə ayrılmış vəsait hesabına rayonun 17 min əhalisinin yaşadığı, 6 yaşayış məntəqəsini birləşdirən  Gəncə-Sərkar-Qarayeri-Qədili avtomobil yolunun tikintisinə başlanmış və  qısa müddət ərzində başa çatdırılaraq sakinlərin istifadəsinə verilmişdir.

  Həmin yolun keçdiyi yaşayış məntəqələrində  geniş abadlıq işləri aparılmış, yolun kənarlarında park və xiyabanlar salınmışdır.

Ümummilli liderin adını daşıyan  mərkəzi istirahət parkında yenidənqurma işlərinə başlanmışdır. Parkda ümumi sahəsi  1400 kv.m. olan Heydər Əliyev mərkəzinin, kafenin, oyun zalının  və  çay evinin tikintisinə başlanmış, hazırda  işlər davam etdirilir. Parkın su sistemi, elektrik təchizatı sistemi  qurulur,   meydanın  və gəzinti yollarının kənarına mərmər bordürlər düzülür. Eyni zamanda parkın sahəsi genişləndirilmiş, giriş  hissəsinin yenidən qurulması başa çatmış, qarşısına dekorativ hasar çəkilişinə başlanmış və hazırda burada işlər davam etdirilir.

Şəhərin Heydər Əliyev prospektinin yenidənqurması  layihəsinə uyğun olaraq, prospektin sağ tərəfində üç ədəd parkın salınması başa çatdırılmışdır. Bu parklarda insanların rahat istirahəti üçün bütün şərait yaradılmışdır.

  Arif Nəbiyev, 28 may, N. Nərimanov, Tofiq İsmayılov və M.P.Vaqif   küçələrində, Kolayır prospektində  təmir və bərpa işləri həyata keçirilmişdir. Kolayır prospektinin və  Samux şəhər - Yenikənd  yolunun kənarında 710 metr uzunluğunda dekorativ hasar quraşdırılmışdır.

Gəncə şəhərindən rayon ərazisinə giriş hissədə olan rayonun ad göstəricisi kompleksi yeni layihə üzrə  inşa edilmişdir.

Tikintisinə ötən il başlanmış  Qarabağ  müharibəsi  əlilləri  və  şəhid  ailələri  üçün 36  mənzilli  4 mərtəbəli   yaşayış  binasında  tikinti işləri tam başa çatdırılmış, hazırda binanın    təhvil  verilməsi ilə bağlı son tamamlama   işləri  görülür. Rayon  Prokurorluğunun yeni inzibati  binası inşa edilərək, istifadəyə verilmişdir.

Rayonun  təhsil, səhiyyə və mədəniyyət  sahələrinin  inkişafı  da daim diqqətdə saxlanılmışdır. Son 9  ildə  rayonda 15 yeni məktəb binası   inşa  edilmiş, 14  məktəbdə, 4 uşaq  bağçasında əsaslı  təmir  işləri  aparılmışdır. Bu baxımdan ötən il daha uğurlu olmuşdur. Belə ki, 2012-ci ildə rayonda  rekord miqdarda yeni məktəb binası inşa edilmişdir. Şəhər 2 saylı tam orta məktəbi üçün 360 şagird yerlik, Lək kənd tam orta üçün 220 şagird yerlik, Poylu və Salahlı kənd məktəbləri üçün isə 180 şagird yerlik, Qiyaslı məktəbi üçün 80 şagird yerlik   yeni məktəb binalarının tikintisi başa çatdırılmış və istifadəyə verilmişdir. Tikintisinə  hesabat ilində başlanmış 180 şagird yerlik Seyidlər  kənd tam orta məktəbində işlər başa çatmışdır.  Samux  şəhər 1 saylı  uşaq  bağçasının  isə  əsaslı  təmirdən sonra istifadəyə verilmişdir.

Hesabat ilində rayonda yeni istehsal sahələrinin və iş yerlərinin açılması istiqamətində də müəyyən işlər görülmüşdür. Rayonun İstixana  kəndi ərazisində  3 hektar   ərazidə faraş  meyvə-tərəvəz istehsal  edəcək “Aqrikola” MMC  İstixana   kombinatı fəaliyyətə başlamışdır. Hazırda kombinatda 30 nəfər daimi işlə təmin edilmişdir, müəssisənin tam  fəaliyyətə  başlaması  ilə  rayonun  100-dən  çox  vətəndaşı  daimi işlə  təmin  olunacaqdır.  Eyni  zamanda  Alternativ  və  Bərpa  Olunan  Enerji  Mənbələri  üzrə Dövlət  Agentliyi  tərəfindən  “Aqroenerjikompleksi”nin  yaradılması müəyyənləşdirilmişdir. Kompleksdə alternativ  enerji  istehsalı  üzrə  elektrik  stansiyasının,  istixananın,  balıq  yetişdirilməsi  hovuzunun, heyvandarlıq  kompleksinin tikintisi  nəzərdə  tutulur. Ümumi  dəyəri  94  milyon  manat  olan kompleksin fəaliyyətə başlaması ilə 1000 nəfər  rayon  sakini  daim  işlə  təmin olunacaqdır. 

Həyata keçirilən tədbirlər nəticəsində 2012-ci  il  ərzində 747  iş yeri  açılmışdır. Onlardan 486 iş  yeri  daimi, 261  iş  yeri  müvəqqətidir.  Ümumilikdə 2004-2012-ci illər ərzində rayonda 4467-si  daimi olmaqla 15403 yeni iş yeri yaradılmışdır.

Cənab başçı 2013-cü  ildə qarşıda  duran  vəzifələrdən danışaraq qeyd etmişdir ki, Nazirlər  Kabinetinin  2012-ci  ilin  sosial-iqtisadi  inkişafının  yekunlarına    həsr  olunmuş  iclasında  Azərbaycan  Respublikası  Prezidenti  cənab  İlham Əliyevin  proqram  xarakterli nitqlərində  qarşıya  qoyduğu  vəzifələri  yerinə  yetirmək  üçün bütün imkanlarımızı səfərbər etməliyik. 

“Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın son ilində Proqramda nəzərdə tutulan işlərin tam yerinə yetirilməsinə nail olmalıyıq. Artıq cari ildə şəhərin kanalizasiya və mərkəzləşmiş içməli su sisteminin qurulması,  qəza vəziyyətində olan Əhmədbəyli kənd orta məktəbi üçün 360 şagird yerlik, Qarabağlar orta məktəbi üçün 180 şagird yerlik yeni məktəb binalarının tikintisi, Alabaşlı, Qırmızı Samux qəsəbə və Zazalı kənd orta məktəblərinin əsaslı təmir olunması  reallaşmışdır.  Yaxın vaxtlarda  bu sahələrdə işə başlanacaqdır.

2013-cü ildə rayonun qəsəbə və kəndlərində  bir neçə uşaq bağçasının açılması, Qarabağ müharibəsi əlilləri və şəhid ailələri üçün  çoxmənzilli  yaşayış binasının,  səhiyyə və mədəniyyət ocaqlarının tikintisi və əsaslı təmiri sahəsində  işlər aparılır.

Eyni  zamanda cari ildə şəhərin küçələrinin yenidən qurulması və kəndlərarası yolların əsaslı təmiri də  əsas hədəflərimizdən biridir.

Qarşımızda duran ən vacib məsələlərdən biri də rayon iqtisadiyyatının daha da genişləndirilməsi, əhalinin ərzaq təminatının və məşğulluğunun tam təmin olunması üçün    yeni  istehsal  və  emal  müəssisələrinin yaradılmasını təmin etməkdən ibarətdir ki, bu istiqamətdə müvafiq işlər aparılır.

Ölkə başçısı tərəfindən 2013-cü ilin “İnformasiya-kommunikasiya texnologiyaları ili”  elan edilməsi də qarşımızda yeni vəzifələr qoyur.

Ümumiyyətlə  2013-cü ildə   rayonda daha  böyük layihələrin həyata keçirilməsi gözlənilir.

Məruzə  ətrafında  çıxışlarda  və  zalda  quraşdırılmış mikrofonlardan rayonun sakinləri  tərəfindən  bir  sıra  problemlərin həll  edilməsi  ilə  bağlı  təkliflər irəli  sürülmüşdür. Təkliflərin həlli ilə bağlı görüləcək işlər qərar layihəsində öz əksini tapmışdır.

Hesabat yığıncağında Milli Məclis sədrinin müavini, Samux rayonundan seçilmiş Millət Vəkili Valeh Ələsgərov, Azərbaycan Respublikası Prezidentinin Administrasiyasının məsul işçisi Habil Əzənmədov çıxış etmişlər. Hər iki natiq çıxışında Azərbaycan Respublikasının Prezidenti cənab İlham Əliyevin yorulmaz  fəaliyyəti nəticəsində ölkəmizdə sosial-iqtisadi və xarici siyasətdə əldə olunmuş möhtəşəm nailiyyətlər haqqında  ətraflı məlumat vermişlər.

Hesabat yığıncağının sonunda  qərar layihəsi və  Azərbaycan  Respublikasının Prezidenti  cənab İlham Əliyevə müraciət  qəbul  edilmişdir. 

 

Keçidlər