Samux rayonunda vətən müharibəsi şəhidinin əziz xatirəsi ildönümündə böyük ehtiramla yad edildi.

Samux Rayon İcra Hakimiyyətinin başçısı Alı Qocayev hüquq-mühafizə orqanlarının rəhbərləri, rayon ictimaiyyəti, şəhidin döyüş yoldaşları, ailəsi və yaxınları ilə birgə Samux rayonunun Qarayeri qəsəbəsindən olan Vətən müharibəsi şəhidi Cəfərov Babək Məxsus oğlunun ildönümü münasibətilə şəhidin məzarını ziyarət etdi. Çıxış edən Samux Rayon İcra Hakimiyyətinin başçısı Alı Qocayev Vətən müharibəsində qazanılan möhtəşəm zəfərdən, Vətən müharibəsi şəhidinin keçdiyi şərəfli döyüş yolundan geniş söhbət açdı. Daha sonra şəhidin yaşadığı ünvanda adına inşa edilmiş ehsan bulağının açılış mərasimi oldu.  Vətən müharibəsi şəhidi Cəfərov Babək Məxsus oğlu  15 avqust 1991-ci il tarixdə Samux rayonunun Qarayeri qəsəbəsində anadan olmuşdur. Samux rayon Qarayeri qəsəbə  tam orta məktəbinin məzunudur. 21 sentyabr 2020-ci il tarixdə Azərbaycan Respublikasının Prezidentinin  müvafiq sərəncamı ilə səfərbərlik üzrə hərbi xidmətə yollanıb. Vətən müharibəsi zamanı bir çox döyüşlərdə fəal iştirak edərək böyük şücaət göstərib. 25 oktyabr 2020-ci il tarixdə Füzuli istiqamətində gedən döyüşlərdə ağır yaralanıb. Uzun sürən reanimasiyadan sonra 08 mart 2021-ci il tarixdə şəhadətə qovuşub. 09 mart 2021-ci il tarixdə Samux rayonunun Qarayeri qəsəbəsində dəfn olunub. Şəhid  torpaqlarımızın işğaldan azad olunması zamanı döyüş tapşırıqlarını yerinə yetirərkən mərdliyin və igidliyin göstərilməsinə və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti İlham Əliyevin müvafiq sərəncamları ilə  “Hərbi xidmətlərə görə”, "Vətən uğrunda", və "Füzulinin azad olunmasına görə" medalları ilə təltif edilib. Evli idi. Məxsus adlı oğlu, Zeynəb adlı qızı var.