Samux Rayon İcra Hakimiyyətinin başçısı Alı Qocayevin rayonun Poylu kənd sakinləri ilə növbəti səyyari görüşü keçirildi

Samux Rayon İcra Hakimiyyətinin başçısı Alı Qocayevin rayonun Poylu kənd sakinləri ilə növbəti səyyari görüşü keçirildi. Görüşdə kənd sakinləri ilə yanaşı İcra Hakimiyyəti başçısının müavinləri, İcra aparatının şöbə müdirləri, hüquq-mühafizə orqanlarının, idarə, müəssisə və təşkilatların rəhbərləri iştirak edirdilər.
Tədbir iştirakçıları ilk öncə Qarabağ döyüşlərində şəhid olmuş kənd sakinlərinin əziz xatirəsinə ucaldılmış abidəni ziyarət edərək önünə gül dəstələri qoydular.
Əvvəlcə Poylu kənd inzibati ərazi dairəsi üzrə icra  nümayəndəsi Kitay Vəliyev kənd barədə iclas iştirakçılarına geniş məlumat verdi. Kənddə görülmüş işlər, elektrik enerjisi, su təminatı, aparılmış abadlıq işləri, əhalini narahat edən məsələlər və problemlər barədə ətraflı danışdı.Daha sonra kənd sakinləri tərəfindən çıxışlar və təkliflər oldu:

1. Bağırov Tahir Qasım oğlu Poylu kənd Ailə Sağlamlıq Mərkəzinə terapevt həkim ilə təmin olunmasını xahiş etdi.
2. Hacıyev Nihat Rasim oğlu hal-hazırda işsiz olduğu üçün işlə təmin olunmasını xahiş etdi.
3. Həsənov İsmayıl Namaz oğlu Böyük şor kanalının lildən təmizlənməsini xahiş etdi.
Kənd sakinləri əhalinin problemlərinin həll edilməsi məqsədi ilə yerlərdə həyata keçirilən tədbirlərə, göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya minnətdarlıqlarını ifadə ediblər.
Səyyar qəbulu yekunlaşdıran Samux RİH-nin başçısı cənab Alı Qocayev kənd sakinləri tərəfindən irəli sürülmüş rəy və təkliflərə baxılması üçün aidiyyəti orqanların rəhbərlərinə yerindəcə müvafiq tapşırıqlar verdi.