Dahi Azərbaycan şairi Nizami Gəncəvinin 880 illik yubileyinə həsr olunmuş “Nizaminin əsrarəngiz dünyası” adlı yubiley tədbiri keçirildi.

16 sentyabr 2021-ci il tarixində Gəncə Regional Mədəniyyət İdarəsinin təşəbbüsü və təşkilatçılığı, Samux rayon İcra Hakimiyyətinin dəstəyi ilə Samux rayonunun Heydər Əliyev adına parkında dahi Azərbaycan şairi Nizami Gəncəvinin 880 illik yubileyinə həsr olunmuş “Nizaminin əsrarəngiz dünyası” adlı yubiley tədbiri keçirildi.
Tədbirdə Samux rayon İcra Hakimiyyətinin başçısı cənab Alı Qocayev, Gəncə Regional Mədəniyyət İdarəsinin rəisi Vasif Cənnətov, rayonun müəssisə rəhbərləri, ziyalılar, mədəniyyət incəsənət işçiləri iştirak etmişdir.
Ilk öncə Samux rayon İcra Hakimiyyətinin başcısı cənab Alı Qocayev, Gəncə Regional Mədəniyyət İdarəsinin rəisi Vasif Cənnətov və rayon ziyalıları Heydər Əliyevin abidəsini ziyarət etmişlər.
Əvvəlcə iştirakçılar Nizami Gəncəvinin “Xəmsə”sinə həsr olunmuş Samux rayon Heydər Əliyev Mərkəzinin dekorativ tətbiqi sənət dərnəyi üzvlərinin əl işlərinin sərgisi ilə, Samux rayon Mərkəzi Kitabxananın kitab sərgisi ilə, rayon Təhsil İdarəsinin təşkilatçılığının rəsm sərgisi ilə tanış oldular.
Sonra Samux rayon Heydər Əliyev Mərkəzində fəaliyyət göstərən könüllü teatrın üzvlərinin ifasında Nizami Gəncəvinin “Yedii gözəl”, "Sultan Səncər və qarının söhbəti", Samux rayon Mədəniyyət Mərkəzinin üzvlərinin ifasında “Xosrov və Şirin”, Samux rayon Sərkar kənd Uşaq Musiqi Məktəbinin müəllimi İslam Əlizadənin (Məcnun) və Heydər Əliyev Mərkəzinin “Samux inciləri” rəqs qrupunun bədii rəhbəri Aygün Mənsimovanın (Leyli) iştirakı ilə “Leyli və Məcnun” poemasından bir hissə təqdim olundu.
Samux rayon Sərkar kənd Uşaq Musiqi Məktəbinin “Şur” instrumental ansamblının, Samux şəhər Uşaq Musiqi Məktəbinin xor dərnəyini ifasında Nizami Gəncəvinin sözlərinə yazılmış mahnı, romans və qəzəllər tədbir iştirakçılarına təqdim edildi.
Musiqi proqramını Sərkar kənd Uşaq Musiqi Məktəbinin müəllimi, Respublikanın Əməkdar Mədəniyyət İşçisi Mehparə Cəfərova, Qarayeri qəsəbə Uşaq Musiqi Məktəbinin müəllimi Zəminə Nuriyeva və şagirdi Jalə Orucova, Samux şəhər Uşaq Musiqi Məktəbinin şagirdi Qaya Nəsibzadə və başqaları musiqi proqramını təqdim etdilər.
Gəncə Regional Mədəniyyət İdarəsinin rəisi Vasif Cənnətov Nizami Gəncəvi ili çərçivəsində Regional idarənin nəzdində fəaliyyət göstərən şəhər və rayon mədəniyyət müəssisələrində yubiley tədbirlərinin ilin sonunadək davam edəcəyini diqqətə çatdırdı.