Samux rayon ictimaiyyət nümayəndələri ilə görüş keçirilmişdir.
Samux Rayon İcra Hakimiyyətinin konfrans zalında 17.07.2014-cü il tarixdə rayon ictimaiyyət nümayəndələri ilə görüş keçirilmişdir. İclasda Azərbaycan Respublikası Prezident Administrasiyasının Regional idarəetmə və yerli özünüidarəetmə orqanları ilə iş şöbəsinin Baş məsləhətçisi Habil Əzənmədov da iştirak edirdi.
İclası giriş sözü ilə açan Samux Rayon İcra Hakimiyyətinin başçısı Alı Qocayev çıxışında respublikamızda həyata keçirilən sosial-iqtisadi siyasətin uğurlarından və rayonda aparılan abadlıq işləri haqqında iclas iştirakçılarına məlumat verdi.
Prezident Administrasiyasının əməkdaşı Habil Əzənmədov öz çıxışında respublikamızın inkişafından və ölkəmizin iqtisadi qüdrətinin yetərincə olduğundan danışdı. Qonaq ziyalıları rayonun inkişafına birbaşa təsir edəcək rəy və təkliflərlə çıxış etməyə çağırdı.
İlk olaraq çıxış üçün söz alan rayonun ağsaqqalı, təqaüdçü Nizami Məmmədov bir ziyalı kimi respublikamızda həyata keçirilən abadlıq-quruculuq işlərinə çox sevindiyini bildirdi. Müstəqil dövlətimizin insan amilinə, yəni azərbaycan xalqının sosial-rifahını yüksəldilməsi istiqamətində aparılan işləri alqışladı.O öz çıxışında rayonda kəndçinin istehsal etdiyi kənd təsərrüfatı məhsullarının satışını həyata keçirən xüsusi şirkətlərin yaradılmasını və kəndlərdə SSRİ dövründən qalmış elektrik dirəklərinin yenisi ilə əvəz edilməsi təklifini irəli sürdü.
Əhmədbəyli kənd tam orta məktəbin müəllimi Eyyub Bayramov 2014-2018-ci il Dövlət Proqramına salınmış Əhmədbəyli kəndindən keçən Gəncə çayı üzərində yeni körpünün qurulmasının vacibliyini qeyd etdi. Daha sonra ziyalı, bu il kəndlərində yüksək səviyyədə tikilib istifadəyə verilmiş kənd tam orta məktəbinə görə cənab prezidentimiz İlham Əliyevə kənd əhalisi adından öz minnətdarlığını bildirdi.
Rayonun Ağsaqqallar Şurasının sədri Həmzə Həmzəyev 1992-ci il fevralın 18-dən etibarən rayonda həyata keçirilmiş abadlıq və quruculuq işlərindən söz açdı. Sonra Həmzə Həmzəyev öz çıxışında rayonumuzda salınacaq olan dairəvi yolun bütün kəndlərdən Gəncə şəhərinə gedən sərnişin daşıma marşurutlarının rayon mərkəzindən keçərək getməsi təklifini irəli sürdü.
Sonda Samux Rayon Toxum Müfəttişliyinin rəisi Rahil Həsənov çıxış etmək üçün söz aldı. Həsənov çıxışında Samux rayonunda “Toxum emalı” zavodunun tikilməsinə şərait yaradılmasını xahiş etdi.
Təklif və xahişlər iclas iştirakçıları tərəfindən bəyənilərək alqışlandı.
