Samux rayon ümumi təhsil məktəblərində Xocalı faciəsinə həsr olunmuş silsilə tədbirlər keçirilib
Samux Rayon Təhsil Şöbəsinin tabeliyində fəaliyyət göstərən ümumi təhsil məktəbləri və məktəbdən kənar müəssisələrdə Xocalı soyqırımının iyirmi altıncı ildönümü ilə əlaqədar silsilə tədbirlər keçirilib.
Təhsil müəssisələrində müxtəlif tədbirlər, şeir müsabiqələri, rəsm müsabiqələri, dəyirmi masalar, flashmob-lar, idman və bilik yarışları təşkil edilib. Video çarxlar, təqdim edilib, Xocalı soyqırımının canlı şahidləri tərəfindən yaşanan dəhşətli anlar məktəblilərə çatdırılıb.
Tədbirlərdə faciə qurbanlarının xatirəsi bir dəqiqəlik sükutla yad edilib, Xocalı faciəsinin tarixindən bəhs olunub. Dərsləri tədris edən müəllimlər fevralın 25-i gecə saatlarından şəhərin toplardan və ağır zirehli texnikadan şiddətli atəşə tutulmağa başlanıldığını və fevralın 26-sı səhər saat 5 radələrində şəhərin tamamilə alova büründüyünü bir daha şagirdlərin diqqətinə çatdırıb. Qırğın nəticəsində 63-ü uşaq, 106-sı qadın, 70-i qoca olmaqla, 613 Xocalı sakini qətlə yetirildiyi, 8 ailənin tamamilə məhv edildiyi, 1275 nəfər əsir götürüldüyü bildirilib.
