Samux rayonunda kütləvi tibbi müayinəyə başlanıldı.
Azərbaycan Respublikası Prezidentinin tapşırığına uyğun olaraq, fevralın 11-dən etibarən ölkəmizin hər yerində olduğu kimi, Samux rayonunda da əhalinin tibbi dispanserizasiyasına başlanıldı. Tibbi müayinələrin keçirildiyi Samux Rayon Mərkəzi Xəstəxanası ən müasir tibbi avadanlıq və aparatlarla təchiz edilib. Qrafikə əsasən, ilk olaraq idarə və müəssisələrin kollektivləri müayinədən keçirilir.
Yaxın günlərdə yüksəkixtisaslı mütəxəssislərdən ibarət bir neçə həkim briqadası tərəfindən rayonun qəsəbə və kəndlərində də əhalinin tibbi müayinəsinə başlanılacaqdır.
Prezident İlham Əliyevin Azərbaycanın hər bir vətəndaşının sağlamlığına diqqəti və qayğıkeş münasibəti sakinlər tərəfindən minnətdarlıqla qarşılanır. Müayinədən keçən rayon sakinləri vətəndaşların sağlamlıqlarının qorunmasına yönələn xeyirxah aksiyanı yüksək dəyərləndirir, bu nəcib təşəbbüsə görə dövlətimizin başçısına minnətdarlıqlarını bildirirlər
