Samux Rayon İcra Hakimiyyəti başçısının 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə dair hesabat yığıncağı keçirildi.
2018-ci ildə Azərbaycan iqtisadiyyatı öz inkişafının yeni mərhələsinə qədəm qoymuşdur. Azərbaycan Respublikasının Prezidenti cənab İlham Əliyevin düşünülmüş neft-qaz strategiyasının reallaşdırılması nəticəsində formalaşan dayanıqlı maliyyə resursları mövcud sənaye potensialından səmərəli istifadə imkanlarını kifayət qədər genişləndirmişdir. Hazırda regionlarda sürətlə yaradılan sənaye zonaları və sənaye məhəllələri çərçivəsində ölkənin müxtəlif bölgələrində onlarla yeni müəssisələr qurulub istifadəyə verilir. Bu müəssisələr artıq iqtisadiyyatın inkişafında öz sözünü deməyə başlamışdır.
Azərbaycan Respublikasının Prezidenti cənab İlham Əliyevin sədrliyi ilə keçirilən Nazirlər Kabinetinin 2018-ci ilin birinci rübünün yekunlarına və qarşıda duran vəzifələrə həsr olunmuş iclasında bu haqda ətraflı danışılmış və ölkə başçısı proqram xarakterli çıxışlarında iqtisadiyyatda və digər sahələrdəki vəziyyəti geniş təhlil etmiş, qarşıda duran vəzifələri müəyyənləşdirmişdir.
İclasda qeyd edilmişdir ki, bu ilin birinci rübündə ölkəmizdə bir neçə mötəbər beynəlxalq tədbir keçirilmişdir. Bu tədbirlər ölkəmizin beynəlxalq nüfuzunu artırır, Azərbaycanı dünyaya müasir, inkişafda olan ölkə kimi təqdim edir. Məhz bu tədbirlər arasında VI Bakı Qlobal Forumunu xüsusilə qeyd etmək lazımdır. Dünyada keçirilən aparıcı forumlar arasında Bakı Beynəlxalq Forumu qısa müddət ərzində öz layiqli yerini tuta bilmişdir. Birinci rübdə ölkəmizə 7 dövlət və hökumət başçısı səfər etmişdir. Bu səfərlər də ölkəmizin dost ölkələrlə ikitərəfli münasibətlərinin inkişafı üçün önəmli rol oynayır.
Bu il ölkəmizdə Qoşulmama Hərəkatının xarici işlər nazirlərinin konfransı keçirilmişdir. Bu, çox önəmli beynəlxalq tədbirdir. Bildiyiniz kimi, Qoşulmama Hərəkatı dünyada BMT-dən sonra ikinci böyük təşkilatdır. Azərbaycan bu təşkilata 7 il bundan əvvəl üzv olmuşdur və qısa müddət ərzində təşkilatda böyük rəğbət və hörmət qazana bilmişdir. Məhz bunun nəticəsidir ki, belə bir mötəbər beynəlxalq tədbir məhz ölkəmizdə keçirilmişdir.
Bütün bu beynəlxalq tədbirlər çərçivəsində və eyni zamanda, Azərbaycana edilən səfərlər, ikitərəfli formatda aparılan danışıqlar nəticəsində bizim beynəlxalq mövqelərimiz daha da möhkəmlənir.
Bu il Azərbaycan Ordusu genişmiqyaslı hərbi təlimlər keçirmişdir. Bu təlimlər bir daha ölkəmizin gücünü göstərdi, düşməni qorxuya saldı. Hərbi amil münaqişənin ədalətli həlli üçün mühüm rol oynayır və bu istiqamətdə ölkə rəhbərliyi tərəfindən ardıcıl işlər aparılır.
İlin birinci rübündə Azərbaycan iqtisadiyyatı 2,3 faiz artmış və bu artım dünya miqyasında mövcud olan artımdan daha yüksək göstəricidir. Qeyri-neft sektorunda isə təxminən 3 faiz artım olmuşdur ki, bu da iqtisadiyyatımızın şaxələndirilməsi istiqamətində aparılan siyasətin nəticəsidir.
Dövlətimizin başçısı nitqlərində qeyd edib ki, birinci rübdə sənaye istehsalı 2 faiz, qeyri-neft sənayesi isə təxminən 10 faiz artıb. Bu da ölkəmizdə son illər ərzində aparılan sənayeləşmə siyasətinin nəticəsidir. Qeyri-neft sənayemiz 10 faiz artıb ki, bu rekord göstərici sayıla bilər. Kənd təsərrüfatı 4,2 faiz artmış və bu artımın tərkibində bitkiçillikdə daha yüksək nəticələr əldə olunmuşdur,belə ki burada artım 50 faizdən çox təşkil edir. Bu da son illər ərzində ənənəvi və digər texniki məhsulların yetişdirilməsi ilə bağlıdır.
Ölkə iqtisadiyyatına 3,5 milyard dollar sərmayə qoyulub və bu sərmayənin böyük hissəsi xarici sərmayədir. Bu, onu göstərir ki, ölkəmiz xarici investorlar üçün çox cəlbedicidir.
Həqiqətən, dünyada baş verən bütün iqtisadi çaxnaşmalara və maliyyə böhranlarına baxmayaraq, Azərbaycan 1994-cü ildən üzü bəri xarici investorlar üçün həmişə cəlbedici ölkə olmuşdur və bu gün də belədir. Əks halda Azərbaycan qlobal regional layihələrdə nəinki iştirak edə, hətta onların reallaşmasında əsas və aparıcı ölkə ola bilməzdi. Belə olmasaydı, həmin layihələr hesabına bu gün Azərbaycanın valyuta ehtiyatları 44,2 milyard dollara çatmazdı. Təkcə cari ilin 3 ayında ehtiyatlarımız 2,2 milyard dollar artmışdır.
Sosial məsələlərin həllinə də daim dövlət başçısının diqqətindədir və birinci rübdə maaşlar və pensiyalar artırıldı. Bu məqsədlər üçün dövlət büdcəmizdən yüz milyonlarla manat vəsait ayrıldı. Bu addım bir daha onu göstərir ki, dövlət siyasətinin mərkəzində Azərbaycan vətəndaşı dayanır.
İclasda qeyd edilmişdir ki, birinci rübdə Dövlət İnvestisiya Proqramında nəzərdə tutulmuş bütün məsələlər öz həllini tapır. Yeni xəstəxanalar, məktəblər inşa edilir, rüb ərzində ölkə başçısı tərəfindən bu məsələlərin həlli üçün sərəncamlar verilmişdir. Yeni idman obyektləri, yeni “ASAN xidmət” mərkəzləri tikilir. Yəni, bu gün Azərbaycanda tikinti sektorunda böyük canlanma var. Mənzil İnşaatı Dövlət Agentliyinin xətti ilə sosial evlərin tikintisində getdikcə sürətlənir.
Ölkəmizdə ümumi inkişaf dinamikası çox müsbətdir. Azərbaycan dünyada daha çox tanınır və turistlərin sayı getdikcə artır, birinci rübdə 12,5 faiz artmışdır. Bunun da bir çox səbəbləri var - Azərbaycanda hökm sürən sabitlik, təhlükəsizlik, xalqımızın qonaqpərvərliyi, tarixi abidələrimiz, infrastruktur, 6 beynəlxalq aeroport, yollar, otellər. Əlbəttə ki, ölkəmizdə keçirilən beynəlxalq tədbirlər Azərbaycanı dünyaya təqdim edir. Onların arasında Avropa Oyunları, İslam Həmrəyliyi Oyunları, “Eurovision” müsabiqəsi və Formula 1 yarışları xüsusi rol oynayır. Çünki Formula 1 yarışlarının tamaşaçı auditoriyası yarım milyard insana bərabərdir. Bu yarışlar respublikamızın mərkəzində keçirilir. Bu da tamaşaçılarda olkəmizə qarşı geniş maraq yaradır.
Gələn ay ölkəmizdə Azərbaycan Xalq Cümhuriyyətinin 100 illiyi qeyd ediləcək. Bu tarixə nəzər salarkən görürük ki, Azərbaycan tarixdə heç vaxt indiki qədər güclü, indiki qədər qüdrətli dövlət olmamışdır. Burada Azərbaycan xalqının iradəsi, Azərbaycan dövlətinin siyasəti əsas amildir.
Heç kim şübhə etmir ki, yenidən növbəti yeddi il üçün Azərbaycan Respublikasının Prezidenti seçilmiş cənab İlham Əliyevin rəhbərliyi altında Azərbaycan bundan sonrakı dövrlərdə də uğurla inkişaf edəcək. Bu gün Azərbaycanın reallıqları onu göstərir ki, xalqımızın seçimi düzgün seçimdir.
2018-ci ilin birinci rübünün yekunu ilə bağlı görülmüş işlərin təhlili göstərir ki, rayon iqtisadiyyatının inkişafındakı artım dinamikası davam etmişdir. Eyni zamanda rayonda tikinti-quruculuq və abadlıq işləri sahəsində işlər uğurla aparılmışdır. Birinci rübün sosial-iqtisadi inkişafının əsas iqtisadi göstəriciləri bunu deməyə əsas verir. Belə ki, hesabat dövründə rayon üzrə ümumi məhsul buraxılışının həcmi 26,7 milyon manat olmuşdur ki, bu da ötən ilin müvafiq dövründəkindən (24,1 mln.manat) 10,9 faiz çoxdur. Cari ilin üç ayında ötən ilin müvafiq dövri ilə müqayisədə sənaye məhsulunun həcmi 38,3 faiz artaraq 2,8 milyon manat, kənd təsərrüfatı məhsullarının həcmi 8,6 faiz artaraq 11,4 milyon manat, tikinti 14,9 faiz artaraq 2,6 milyon manat təşkil etmişdir. Hesabat dövründə pərakəndə əmtəə dövriyyəsi 4,7 faiz, əsas kapitala yönəldilən investisiya 10,9 faiz artmışdır.
Azərbaycan Respublikasının Prezidenti cənab İlham Əliyevin 27 fevral tarixli 18 saylı Fərmanı ilə təsdiq edilmiş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”-nın yerinə yetirilməsi istiqamətində rayonda görülən işlər davam etdirilmişdir. Belə ki, Burunqovaq kəndində inşa edilmiş modul tipli məktəb binasının tikintisi başa çatdırılaraq istifadəyə verilmişdir.
Şəhərin Heydər Əliyev və Kolayır prospektlərində, Nəriman Nərimanov, Elçin Məmmədov, Arif Nəbiyev küçəlrində, Kür yolunda aparılan yenidənqurma və
bərpa işləri başa çatdırılmışdır. Yararsız bort daşları və tavalar sökülərək yenilənmiş, keyfiyyətsiz hasarlar yenidən hörülmüş, suvanma və rəngləmə işləri həyata keçirilmişdir. Heydər Əliyev pprospektində və Arif Nəbiyev küçəsində hasarların “Aqlay” tava daşları ilə üzlənməsi və bərpa işləri aparılmışdır. Kolayır prospektində 54, Elçin Məmmədov küçəsində 27, Kür küçəsində 27, Nəriman Nərimanov küçəsində 8 ədəd olmaqla,ümumilikdə 116 ədəd, eyni zamanda Qarayeri qəsəbəsində 14 ədəd müasir işıqlandırıcı quraşdırılmış və abadlıq işləri həyata keçirilmişdir.
Rayonun Çobanabdallı kəndində yataqxana tipli, ikimərtəbəli bir bloklu, hər biri 16 mənzilli, ümumi sahəsi 2020 kv.m. olan iki binada blokların təmiri, qapı və pəncərələrin quraşdırılması işləri aparılır. İstixana kəndində ikimərtəbəli, iki bloklu, hər biri 12 mənzilli,sahələri 1445 kv.m olan iki binada isə təmir-bərpa işlərinə başlamaq üçün hazırlıq işləri aparılır.
Rayonun uzunluğu 15,3 km olan İnstitut - Çobanabdallı-Lək- Əli Bayramlı və uzunluğu 12,7 km olan Yenikənd -Qırmızı Samux kəndlərarası avtomobil yollarında yenidənqurma və bərpa işlərinə başlanmışdır. Hazırda həmin yolların torpaq yatağının bərbası, qazıntı və su keçidlərinin quraşdırılması işləri başa çatmışdır.
Azərbaycan kənd investisiya layihəsi çərçivəsində rayonun Qırmızı Samux qəsəbəsində, Yenikənd, Lüksemburq, Çobanabdallı, Qarabağlar və Əli Bayramlı kədlərində daxili yolların təmir-bərpa işlərinə başlamaq üçün sənədləşmə işləri başa çatmışdır. Yaxın vaxtlarda işlərə start veriləcəkdir.
Rüb ərzində bütün istiqamətlərdə yolların çiyin hissələri avtoqreyderlə plana salınmış, torpaq yatağı maillikləri kol-kosdan təmizlənmişdir. Gəncə - Samux, Samux - Lək, Samux- İnstitut, Qırmızı Samux-Burunqovaq, Samux-Yenikənd-Poylu avtomobil yollarında və çiyin hissələrində 65 min m2 sahədə çınqıl materialı ilə təmir işləri aparılaraq 9,0 min m3 həcmində çınqıl materialı işlədilmişdir.
Azərbaycan Respublikası Prezidenti cənab İlham Əliyevin ölkədə kənd təsərrüfatının inkişaf etdirilməsi, ərzaq təhlükəsizliyinin təmin edilməsi məqsədilə verdiyi müvafiq tapşırığa əsasən rayon ərazisində iri təsərrüfatların yaradılması istiqamətində işlər davam etdirilmişdir. Hazırda rayonda “AQRO DAİRY” Məhdud Məsuliyyətli Cəmiyyət, “Boz dağ” heyvandarlıq kompleksi, “Ulduz 2011” MMC, “Qarabağ Region MKT” MMC , Vest Milk MMC, Murovdağ Kəndli fermer təsərrüfatı, Hevandarlıq və Yemçilik müəssisəsi, “Region Aqro” MMC kimi iri sahibkar təsərrüfatları fəaliyyət göstərir. Eyni zamanda rayonda 153 müasir istixana fəaliyyət göstərir ki, onların da ümumi sahəsi 72,6 hektardan təşkil edir. Bu istixanalarda il ərzində 8000 tondan cox faraş tərəvəz - pamidor, xiyar yetişdirilir. Bu məhsulların cox hissəsi MDB ölkələrinə ixrac olunur.
İlin əvvəlində respublikamızın hər yerində olduğu kimi, rayonumuzda da əhalinin məşğulluğu sahəsində yaranmış problemin aradan qaldırılması məqsədi ilə ölkə başçısının tapşırığı əsasında yeni iş yerlərinin yaradılması və ictimai işlərin təşkili istiqamətində tədbirlər həyata keçirilmişdir. Belə ki, rüb ərzində 79-u daimi olmaqla 271 yeni iş yeri yaradılmışdır. Yaradılmış yeni iş yerlərindən 4-ü Sahibkarlığa Kömək Milli Fondu tərəfindən rayon sahibkarlarına 4 layihə üzrə verdiyi 26,0 min manat güzəştli kreditin hesabınadır.
Bununla bərabər işaxtaran vətəndaşlar arasında özünəməşğulluq proqramının həyata keçirilməsinə başlanmışdır. Bu proqrama 27 nəfər cəlb edilmiş, müvafiq söhbətlərdən sonra, onlardan 25 nəfəri Beynəlxalq Əmək Təşkilatının təlimlərinə qatılmış və bir aylıq təlimlər başa çatmışdır. Müvafiq müsahibədən sonra məqbul hesab edilmiş biznes planlar üzrə özünəməşğulluq təmin ediləcəkdir. Qeyd edək ki, ötən il 9 nəfərlə özünəməşğulluq layihəsi üzrə müqavilə bağlanmışdır və hazırda uğurla icra edilir.
Azərbaycan Respublikasının Prezidenti cənab İlham Əliyevin respublikamızda kənd təsərrüfatının inkişaf etdirilməsinin daha da sürətləndirilməsi ilə bağlı tapşırıq və tövsiyələrinin, imzaladığı sərəncamlardan irəli gələn vəzifələrin icrasını təmin etmək məqsədi ilə, iqtisadiyyatının əsasını aqrar sektor təşkil edən rayonumuzda cari ildə sahələrdən yüksək məhsul əldə etmək üçün lazımi tədbirlər həyata keçirilmişdir. 2018-ci ilin məhsulu üçün 9924,0 hektar sahədə taxıl əkilmişdir ki, onun da 6293,0 hektarı buğda, 3629,0 hektarı dən üçün arpadır.
Cari ildə 2167 hektar sahədə yazlıq bitkilərin səpini aparılmışdır. Onlardan 807,0 hektarı şəkər çuğunduru, 869,0 hektarı dən üçün günəbaxan, 168,0 hektarı kartof, 323 hektarı tərəvəzdir. Ölkə başçısının şəkər cuğunduru əkininin stimullaşdırılması ilə bağlı imzaladığı məlum sərəncamdan sonra bu sahəyə diqqət daha da artmışdır. Cari ildə 1000 hektardan yuxarı şəkər çuğunduru əkilməsi proqnozlaşdırılır.
2018-ci ilin 01 aprel tarixinə iri buynuzlu mal-qaranın sayı 23 683 baş olmuşdur. Bundan ana inək və camışların sayı 11862 baş təşkil edir. Qoyun və keçilərin sayı 154653 başdır.
Birinci rübdə 1471 ton diri çəkidə ət, 7244 ton süd, 2,5 milyon ədəd yumurta istehsal olunmuşdur. Heyvandarlıq mənsullarının istehsalında da ötən ilin müvafiq dövrü ilə müqayisədə artım vardır.
Kənd təsərrüfatı məhsullarının istehsalında yüksək nəticənin əldə olunmasında əsas şərtlərdən biri əkin sahələrinin suvarma suyu ilə təminatı məsələsidir. Bu sahə daim ölkə başçısının diqqətində saxlanılır. “Əkin sahələrinin suvarma suyu ilə təminatının yaxşılaşdırılmasına və əhalinin içməli suya olan tələbatının ödənilməsinə dair əlavə tədbirlər haqqında” Azərbaycan Respublikası Prezidentinin müvafiq sərəncamları bunun əyani sübutudur. Bu sərəncamlar əsasında rayonumuzda 56 subartezian quyusunun qazılıb istifadəyə verilməsi nəzərdə tutulmuşdur ki ,onlardan 46-sı istifadəyə verilmişdir. Digər 10 subartezian quyusunun qazılması üçün hazırlıq işləri görülür.
Bununla bərabər 2018-ci ilin birinci rübü ərzində 96 ədəd nasos, 14 ədəd elektrik avadanlığı təmir edilmişdir. Torpaqların suvarılması üçün kanallarda 80 min m3 lildən təmizləmə, 21 min m3 sahilbərkitmə işləri görülmüşdür. Kanallarda 9 ədəd hidrotexniki qurğu, 4 ədəd hidropostlar təmir edilmiş, 3200 m2 kol-koslardan təmizləmə işləri aparılmışdır. Rüb ərzində Gəncə çayında 4 min m3, Qabırrı çayında 3 min m3, Qoşqar çayında 2 min m3 əlavə sahilbərkitmə işləri görülmüşdür.
Rayon əhalisini dayanıqlı elektrik enerjisi ilə təmin etmək üçün 2018-ci ilin birinci rübü ərzində Samux şəhərinin Kolayır massivində, Sərkar, Ziyadlı və Çobanabdallı kəndlərində elektrik şəbəkəsinin yenidənqurulması işləri həyata keçirilir. Kolayır massivində 10 kv-luq hava xəttinin yenidən qurulması üçün 476 ədəd dayaq basdırılaraq 83,0 km As 70 naqili çəkilmişdir. Rüb ərzində Kolayır massivində 9, Əli Bayramlı kəndində 1, Yuxarı Ağasıbəyli kəndində 1, Aşağı Ağasıbəyli kəndində 1 ədəd, ümumilikdə 12 ədəd yeni kompleks transformator məntəqəsi (KTM) quraşdırılmışdır. Eyni zamanda Sərkar kəndinin girişində 1 ədəd 6/10 kv-luq 2,5 MVA gücündə transformator quraşdırılmışdır. Sərkar, Ziyadlı, Çobanabdallı və Burunqovaq kəndlərində ümumilikdə 7,3 km SİP naqil çəkilmişdir.
Əhalinin təbii qazla təminatının yaxşılaşdırılması istiqamətində də müəyyən işlər görülmüşdür. Hal-hazırda rayonun 30 yaşayış məntəqəsində mavi yanacaqdan istifadə olunur ki, bu da rayon üzrə 85,7 faiz yaşayış məntəqəsinin təbii qazla təmin olunması deməkdir. Rüb ərzində rayonun abonentlərin fasiləsiz və normal təbii qazla təmin olunması məqsədilə müvafiq təmir-bərpa işləri həyata keçirilmişdir.
İstehlak olunmuş enerjinin, təbii qazın və içməli suyun dəyərinin vaxtında, tam ödənilməsi üçün rayon İcra Hakimiyyəti başçısı yanında fəaliyyət göstərən qərargah tərəfindən müvafiq işlər aparılmışdır. Əhali tərəfindən istehlak olunmuş elektrik enerjisinin dəyərinin 95,05 faizi, təbii qazın dəyərinin 101,9 faizi yığılmışdır.
Bununla bərabər rayon İcra Hakimiyyətində yaradılmış “Qaynar xəttə” daxil olan məlumatlar, səyyar və fərdi qəbullarda edilən müraciətlər göstərir ki, əhalinin elektirik enerjisi və təbii qazla təminatında müəyyən problemlər hələ də mövcuddur. Xidmətlərin rəhbərləri bundan ciddi nəticə çıxarmalı və mövcud nöqsanların aradan qaldırılması üçün təxirəsalınmaz tədbirlər görməlidir.
2018-ci ilin birinci rübündə Samux rayon İcra Hakimiyyəti başçısı aparatına ümumilikdə 124 ərizə, təklif və şikayət daxil olmuşdur ki, bu da ötən ilin müvafiq dövründəkindən 16 ədəd (140 ədəd) və ya 11,4 faiz azdır. Müraciətlərdən 38-i (63) yerli sakinlərdən, 86-sı (77) isə respublikanın yuxarı təşkilatlarından olmuşdur. Rüb ərzində daxil olmuş ərizələrdə qaldırılan məsələlər yerində araşdırılmış, vətəndaşların haqlı tələbləri vaxtında həll edilmişdir.
Birinci rübdə rayon İcra Hakimiyyətinin başçısı tərəfindən rayonun hüquq mühafizə orqanlarının və xidmət təşkilatlarının rəhbərləri ilə birgə həftədə bir dəfə olmaqla rayonun bütün yaşayış məntəqələrində 10 səyyar qəbul-görüş keçirilmişdir. Bu görüşlərdə 30 müraciət edilmişdir. Müraciətlər əsasən yolların təmiri, yeni yaşayış massivlərinin elektrik enerjisi və təbii qazla təminatı, torpaq, suvarma suyu ilə təminat, bağça tikintisi, tibb müəssisələrinin təmiri ilə bağlı olmuşdur. Müraciətlərin 26-sı (86,7 %) icra edilmiş, 4-ü (13,3%) hazırda icradadır.
2018-ci ilin qalan rüblərində də qarşımızda yerinə yetiriləsi vacib olan daha böyük vəzifələr durur. Nazirlər Kabinetinin 2018-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında Azərbaycan Respublikası Prezidenti cənab İlham Əliyevin proqram xarakterli nitqlərində qarşıya qoyduğu vəzifələri yerinə yetirmək üçün bütün imkanlarımızı səfərbər etməliyik:
- Qarşımızda duran ən vacib məsələlərdən birincisi ölkə başçısı tərəfindən kənd təsərrüfatının inkişafına göstərilən diqqət və qayğıya layiqincə cavab vermək, bu imkandan maksimum yararlanaraq rayon iqtsadiyyatının əsasını təşkil edən kənd təsərrüfatı məhsullarının istehsalının genişləndirilməsi;
- Başlanmış işlərin müvəffəqiyyətlə başa çatdırılması;
- Tikinti - quruculuq işlərinin davam etdirilməsi;
- Şəhərin küçələrinin yenidən qurulması və kəndlərarası yolların əsaslı təmiri də əsas hədəflərimizdəndir və bu sahədə müvafiq işlər aparılır;
- Rayonun 14 yaşayış məntəqəsini əhatə edən mərkəzləşdirilmiş içməli su sisteminin çəkilişinə başlanmışdır ki, onuda uğurla başa çatdırmalıyıq;
- Rayonun Sərkar kənd orta məktəbi üçün 650 şagird yerlik, İnstitut qəsəbə tam orta məktəbi üçün 650 şagird yerlik yeni məktəb binalarının, Qarayeri qəsəbə 2 saylı tam orta məktəbi üçün 200 şagird yerlik, Alıuşağı kənd tam orta məktəbi üçün isə 120 şagird yerlik əlavə korpusların tikintisi həyata keçirilməsi əsas vəzifələrdəndir.
Eyni zamanda əhalinin məşğulluğunun təmin olunması üçün yeni istehsal və emal müəssisələrinin yaradılması istiqamətində də işlər görülür.
